तीळाच्या वड्या

साहित्य :

भाजलेल्या शेंगदाण्याचा कूट, भाजलेल्या पांढर्या तीळाचा कूट, गूळ, किसलेले कोरडे खोबरे, पाणी

कृती :

भांड्यात थोडा गूळ घालून त्यात अगदी थोडेसेच पाणी घालून गॅसवर मंद आंचेवर ठेवावे. सारखे ढवळत रहावे. गूळ पातळ झाल्यावर बुडबुडे यायला लागल्यावर खाली उतरवून त्यात शेंगदाण्याचा व तीळाचा कूट समप्रमाणात घालावा. गोळा झाल्यावर,

ताटाला थोडे तूप लावून त्यावर तो थापावा थापतानाच त्यावर किसलेले खोबरे पसरावे व वड्या पाडाव्यात.

ड्रायफ्रूट लोणचे ( Dry Fruit Pickle )

साहित्य : 

१ किलो लिंब, १ किलो साखर, १ वाटी मीठ, १०० ग्राम खारीक ( बीया काढून ), १०० ग्राम जर्दाळू ( बीया काढून ), ५० ग्राम मनुका, ५० ग्राम आले, ५० ग्राम जिरे, ५० ग्राम मीरे ( जाडसर पूड करून ), ५० ग्राम सुक्या लाल मिरच्या.

कृती : 

खारीक , जर्दाळूचे तुकडे करून घ्यावेत, मिरच्याचे तुकडे करावेत, एका लिंबाच्या ८ याप्रमाणे तुकडे करून बीया काढाव्यात, साखरेशिवाय सर्व साहित्य एकत्र करावे व ते मुरल्यावर ( ७-८ दिवसांनी ) एका पातेल्यात काढून घेऊन त्यात साखर घालून मिसळावे. २-४ तासांनी साखर विरघळेल. बरणीत भरून ठेवावे. हे लोणचे फ्रीजमध्ये ठेवल्यास जास्त दिवस टिकते.

कणकेचे लाडू : ( Kanakeche Ladoo - Wheat flour Ladoo )

साहित्य :

           ४ वाटया   कणिक, १ १/२ वाटया बेसन, ३ वाटया जाड पोहे, किसलेले कोरडे खोबरे पाव वाटी, खारीक पावडर पाव वाटी, खसखस पाव वाटी, पांढरे तीळ पाव वाटी, गूळ किसून ३ वाट्या, तूप, वेलदोड्याची पूड.

कृती :

         कणिक तूपावर चांगली बदामी रंगावर भाजावी. बेसन पण भरपूर तूपावर भाजून घ्यावे. जाड पोहे भाजून हाताने चुरावे किंवा मिक्सरवर जाडसर करावे. खोबरे, खसखस, तीळ भाजून बारीक करून घ्यावे. हे सर्व साहित्य आणि खारीक पावडर एकत्र करावे. त्यात गूळ मिसळून खूप मळावे. ( गूळ गरम करून पातळ केला तरी चालेल, पण तो जास्त वेळ गॅसवर ठेवल्यास मिश्रण कोरडे होऊ शकते ). गूळाचे प्रमाण आवडीप्रमाणे कमी-जास्त घेऊ शकता. त्यात वेलदोड्याची पूड घालून लाडू वळावेत.